طعم الغربة . الشاعرة اسماء الجنيد

هديك الليلة شوفو الغربه ماشه شوي
وأنا البتضارا من عينيها ما تشوفني وتنادى على
وأنا البتشابا فوق للغيمه كان الغيمه تشفع لي
تحضني وتحلق فوق ديارنا العامرة تسرح بي

أصلو الغربة يا أهلي دريباً قاسى مليان شوك يطعن في القليب الحي
وكت عتبت باب بيتنا ودموعكم تجرى تصرخ وى
بحس بجريها في ضلوعى وتطعن في كبيدتى شديد وما هو شوى
بحس بالخطوة تبقى تقيله أريت التانيه ترجع بي

وألاقيك يمه... ألاقى الخالة.... ألاقى العمة بتقول لي
ودعتك الله ود بطني..قريب ترجع تانى تضوي متل الضى
وسقت خطاي.. وشلت حنانكم الغالي وحفظتو معاى بين ايدى

هديك الليلة شوفو الغربه ماشه شوى
هناك في الغربة يا أهلي ...بشوف الناس غريبة وتايهه
في أحزانا طاويه ألحي

بشوف في عيونا يا أهلي نظرات الودار بتكوي وتخلف الكى
وحتى القمرا ..ما بتشبه قمربلدى البضوى الساحة صافى لبى

وما فى أحنً من أهلي ..منو الغيركم بعرف البى
ويقاسمني الزمن لو جاني تارى على

هديك الليلة شوفو الغربه ماشه شوى
وأنا البتضارا من عينيها ما تشوفني وتنادى على
وأنا البتشابا فوق للغيمه كان الغيمه تشفع لي
تحضني وتحلق فوق ديارنا العامرة تسرح بي